រន្ទះ ផ្លេកបន្ទោរ គឺមានភាពស្រស់ស្អាតគួរឲ្យគយគន់ ប៉ុន្តែវាក៏អាចធ្វើឲ្យអ្នកអាចស្លាប់បានដែរក្នុងមួយប្រព្រិចភ្នែកប៉ុណ្ណោះ ប្រសិនបើអ្នកមិនយល់ច្បាស់ពីរបៀបការពារវា។ ជារៀងរាល់ឆ្នាំ រន្ទះបានសំលាប់មនុស្សជាច្រើននៅក្នុងប្រទេសកម្ពុជា។ ភាគច្រើនអ្នកដែលរងគ្រោះច្រើននៅទីជនបទ។ ទោះបីរន្ទះគួរឲ្យខ្លាចក៏ដោយ ប៉ុន្តែក៏មានវិធីការពារបានដែរ។ សូមចំណាយពេលអានអត្ថបទខាងក្រោមដើម្បីស្វែងយល់ពីគ្រោះថ្នាក់នេះ វិធីការពារខ្លួនអ្នក និងគ្រួសារអ្នក។ ស្វែងយល់ថាតើ អ្នកកំពុងឋិតនៅក្នុងគ្រោះដែរឬទេ?
ប្រសិនអ្នកនៅក្រៅផ្ទះហើយអ្នកឃើញផ្លេកបន្ទោរនិងសំលេងផ្គរលាន់កំពុងឈានមកជិតអ្នក ឬមួយរោមឬសក់រាងបះត្រង់ ឬវត្ថុលោហះតូចៗចាប់ផ្តើមញ័រនោះ ត្រូវ ឈប់ធ្វើអ្វីៗទាំងអស់ដែលអ្នកកំពុងតែធ្វើ ហើយរត់ទៅកាន់ទីដែលមានសុវត្ថិភាពឲ្យ បានលឿនបំផុត។
ខាងក្រោមនេះជារបៀបដែលអ្នកអាចប៉ានប្រមាណមើល ថាតើរន្ទះនៅជិតអ្នកប៉ុណ្ណា?
ពេលដែលផ្លេកបន្ទោរព្រាកៗ អ្នកចាប់ផ្តើមរាប់ តើមានប៉ុន្មានវិនាទីរហូតដល់ពេលឮសំលេងផ្គរលាន់។ បន្ទាប់មកអ្នកយកចំនួនវិនាទីនោះចែកនឹង៣ នោះអ្នកនឹងបានតំលៃចំងាយប្រហាក់ប្រហែល (គិតជាគីឡូមែត្រ) ពីខ្លួនអ្នកទៅនិងរន្ទះ។ តែសូមប្រយ័ត្ន មានផ្លេកបន្ទោរច្រើនក្នុងពេលតែមួយដែលអាចធ្វើឲ្យអ្នកច្រឡំ មិនដឹងមួយណាជាមួយណា?
ឧទាហរណ៏
អ្នកឃើញផ្លេកបន្ទោរ បន្ទាប់មកអ្នករាប់ដល់៩វិនាទីទើបឮសូរសំលេងផ្គរលាន់។ នោះបានន័យថារន្ទះនៅឆ្អាយពីអ្នកតែ៣ គីឡូមែត្រប៉ុណ្ណោះ ឬអាចជិតជាងនេះ។
បើសិនអ្នករាប់ចំនួនវិនាទីបានតិចជាង ១៥វិនាទី (រន្ទះបាញ់ គឺនៅចំងាយ៥គីឡូម៉ែត្រពីអ្នក) នោះអ្នកអាចឋិតក្នុងតំបន់គ្រោះថ្នាក់នៃរន្ទះហើយ។ សូមឈប់ធ្វើសកម្មភាពដែលអ្នកកំពុងតែធ្វើ ហើយរត់ទៅរកទីកន្លែងមានសុវត្តិភាព។
សុវត្ថិភាពនៅក្រៅផ្ទះសំរាក ឬពន្យារពេលរាល់សកម្មភាពកំពុងតែធ្វើ ប្រសិនឃើញមេឃខ្មៅងងឹត (រាងដូចព្យុះ) បក់ជិតមកជិតដល់។ទៅរកផ្ទះ ឬអាគារដែលមានសុវត្ថិភាព។ ចូលជ្រកក្នុងឡានដែលមានដំបូលរឹង ហើយបិតកញ្ជក់។ ចៀសវាងការកាន់កន្លែងដែកណាមួយនៃតួឡានកុំនៅជិតដើមឈើខ្ពស់វែងតែងង។ ចៀសវាង ធ្វើឲ្យខ្លួនអ្នកខ្ពស់ជាងវត្ថូអ្វីៗទៀតនៅជុំវិញអ្នក។ ត្រូវអោន ឬធ្វើខ្លួនអ្នកឲ្យទាបតាមតែអាចធ្វើទៅបាន។ បើអ្នកនៅលើភ្នំ កុំនៅជិតជួរដើមឈើខ្ពស់ៗ យកចេញឲ្យឆ្ងាយនូវសារធាតុលោហះនៅជិតខ្ឡួន ដូចជា៖ ចប ប្រដាប់វាយកូនហ្គោល ដងសន្ទូច ឈើច្រតកន្តាបស្ពាយធ្វើពីលោហះបើអ្នកកំពុងហែលទឹក ត្រូវចាកចេញពីទឹកភ្លាម (ព្រោះរន្ទះអាចបាញ់ទៅលើផ្ទៃទឹក អាចឆក់ដល់អ្នក)។ បើអ្នកជិះទូក ត្រូវឋិតនៅលើទូក (កុំលោតចូលទឹក) ហើយកុំប៉ះរបស់របរដែលមានធាតុលោហះ កុំនៅផ្តុំជាមួយមនុសច្រើនគ្នា ព្យាយាមនៅឲ្យឆ្ងាយពីគ្នា។
ចៀសវាងកន្លែងវាលៗ ដូចជាវាលស្រែ កន្លែងលេងបាល់ កន្លែងវាយកូនហ្គោល។ ពេលអ្នកឈរ ឬលេងនៅទីនោះ អ្នកអាចស្ថិតក្នុងសណ្ឥានខ្ពស់ជាងវត្ថុផ្សេងៗ ដែលងាយឲ្យអ្នកទទួលរងគ្រោះថ្នាក់ពីរន្ទះបាញ់។
កុំនៅក្បែរអង់តែនទូរសព្ទ័ ទូរគមនាគមន៏ផ្សេងៗ កុំនៅក្បែរដង់ទង់ជាតិ បង្គោលភ្លើង របងដែក បង់អង្គុយដែក កង់ ម៉ូតូ ជាដើម។ ប្រសិនចៃដន្យ អ្នកនៅក្រៅផ្ទះ ហើយគ្មានកន្លងជ្រកទេ។ អង្គុយចោងហោង អោនក្បាលទៅមុខ យកដៃទាំងពីរគ្របត្រចៀក (សូមមើល រូប)។ ធ្វើយ៉ាងនេះដើម្បីឲ្យខ្លួនអ្នកនៅទាបបំផុតពីវត្ថុជុំវិញ។ ចំាថារន្ទះបាញ់ វាបាញ់វត្ថុដែលខ្ពស់ងាយចំលងចរន្តបាន។ តែហាមអ្នកមិនត្រូវដេករាបដល់ដីទេ។សុវត្ថិភាពនៅក្នុងផ្ទះ
សូមចាំថាខ្សែភ្លើង និងបំពង់ទុយោផ្សេងៗដែលធ្វើពីលោហះ អាចចំលងចរន្តបាន។ កុំប្រើ ឬត្រូវដកខ្សែភ្លើងចេញពី ឧបករណ៏ដែលប្រើភ្លើង បើមិនចាំបាច់បិទម៉ាស៊ីនត្រជាក់ និងកុំព្យួទ័រ ចៀសវាងឡើងភ្លើងខ្លាំងធ្វើឲ្យឆេះ។ កុំប្រើទូរស័ព្ទមានខ្សែ លើកលែងតែមានករណីចាំបាច់សូមកុំងួតទឹក (បើមិនចាំបាច់ឧបករណ៏បន្ទប់ទឹកខ្លះ ធ្វើពីលោហះ ហើយបានតភ្ជាប់បំពង់លោហះផ្សេងទៀតវាអាចធ្វើឲអ្នកឆក់) ចៀសវាងការកាន់របស់របរទាំងឡាយដែលអាចចំលងចរន្តអគ្គីសនីបាន។ នៅឲ្យឆ្ងាយពីទ្វារ និងបង្អួច ចៀសវាងកាន់ជញ្ជាំងស៊ីម៉ង ឬពិដានដែលមានឆ្អឹងដែកធំៗ បង្កប់ពីខាងក្នុង (ប្រយ័ត្នឆក់)
អ្នកក៏អាចមានគ្រោះថ្នាក់បានដែរ ទោះបីអ្នកមិនស្ថិតនៅកណ្តាលព្យុះ ឬរន្ទះនោះក៏ដោយ។ រន្ទះអាចបាញ់ឆ្ងាយច្រើនគីឡូម៉ែត្រពីកន្លែងដែលមានព្យុះឬរន្ទះ។ ម៉្យាងទៀតរន្ទះអាចរត់នៅក្នុងដីជាច្រើនម៉ែត្រ។ ដូច្នេះ នៅឲ្យឆ្ងាយពីដើមឈើ ឬវត្ថុខ្ពស់ដែលនៅដាច់ពីគេ។ ដោយសារហេតុនេះហើយជួនកាលមនុស្សម្នាក់ត្រូវរន្ទះបាញ់ ទោះបីអ្នកមិនឃើញរន្ទះ បាញ់ចំម្នាក់នោះក៏ដោយ។
សូមចាំថា គ្មានកន្លែងណាដែលអាចគិចពីរន្ទះបាន១០០% នោះទេ គ្រាន់តែកន្លែងខ្លះមានសុវត្ថិភាពជាងកន្លែងមួយទៀតតែប៉ុណ្ណោះ។ ទោះបីជាមានមនុស្សខ្លះត្រូវរន្ទះបាញ់ចំក៏ដោយ តែអ្នករងគ្រោះភាគច្រើនគឺស្ថិតនៅទីតាំង ឬសណ្អានដែលអាចឲ្យចរន្តងាយរត់កាន់ខ្លួនពួកគេបាន។ ដូចនេះចូលការពារខ្លួនអ្នក ដើម្បីកុំឲ្យអ្នកក្លាយជាជនរងគ្រោះបន្ទាប់ទៀត។
| < Prev |
|---|
